 |
| Happy raksha bandhan |
दाम्पत्यं च सुमानुषं भवति चेत् गार्हस्थ्यमत्यद्भुतम्
सौभ्रात्रं यदि सुस्थिरं भवति चेत् सौख्यं सदा राजते ।
एवं सत्परिवारबन्धनविधौ पुत्त्रस्य पुत्र्यास्तथा
पत्नोर्मानसमादिमं बहुविधं भाग्यं च दिव्यं भवेत् ॥ १॥
सौहार्द जनसम्मतं यदि भवेत् स्थैर्यं च राराज्यते
तत्स्थैर्येण च राजिते च भुवने सौराज्यमापद्यते ।
सर्वं बन्धनपञ्चकं सुविशदं चादर्शयुक्तं भवेत्
विद्याभ्यासवशेन सद्गुरुपदे लभ्येत वै शाश्वतम् ॥ २॥
तस्मादेव महर्षिभिश्च कलिता सर्वैः सदा संस्कृतिः
संस्कारेषु गुरोः समीपगमनं प्राधान्यमाहुः परम् ।
वेदानाम् अधिवाचनं सुमहितं शिक्षादिसद्द्बोधनम्
कर्तुं चाश्रमसन्निधौ च वसतिः पूर्वैः सदा कल्पिता ॥ ३॥
वेदारम्भजने तदा लसदुपाकर्मैव तत्कल्पितम्
तद्दीक्षाव्रतमाहितं खलु तदा राकाव्रतं कथ्यते ।
तद्राकाव्रतमेव श्रावणमहामासे जनैः पाल्यते
अन्येषां च कृते च रक्षणपरे रक्षासु बन्धः कृतः ॥ ४॥
रक्षाबन्धनपर्वपूतमनिशं सत्सोदरीभिः मुदा
नानाचित्रविचित्रभासुरमिदं चेक्रीयमाणं सदा ।
सर्वे सोदरबान्धवैः बहुविधं चोपायनं दीयते
मिष्टान्नं बहु भुज्यते मधुमयं बान्धव्यमाबध्यते ॥ ५॥
मान्या भारतसंस्कृतिः जनतया कल्याणसम्पत्करी
संस्कृत्या च समाजनिर्मितरसौ धन्या शुभा जायते ।
सङ्गे शक्तिरनुत्तमा विजयते संस्कारबन्धेन च
तेनैवात्र च सौमनस्यमनुषं तस्माच्च शान्तिः सुखम् ॥ ६॥
दाम्पत्येन च सौमनस्यमपरं सौभ्रात्त्रमत्यद्भुतम्
पित्रोः पुत्रचयेन सङ्गतिरसौ शस्या भवेन्निश्चितम् ।
सम्बन्धत्रितयेन गेहसुखता राराज्यतेऽहर्निशं
मान्यैस्तत्परिवारनिचयैः सङ्गो भवत्यद्भुतः ॥ ७॥
तत्सङ्गैः शुभराज्यनिर्मितिरसा राजन्वती जायते
षड्बन्धाः गुरुनिर्भरा गुरुकुले संवर्धमानाः पराः ।
योगे चक्रसुसंस्थितिः निरुपमा षण्णां यथा दृश्यते
तद्वत्सङ्घपराः सुनिशिताः नूनं सुखं शाश्वतम् ॥ ८॥
thanks for a lovly feedback