 |
| bhagwat chapter 10.5 |
श्रीशुक
उवाच
नन्दस्त्वात्मज उत्पन्ने जाताह्लादो
महामनाः ।
आहूय विप्रान् वेदज्ञान् स्नातः
शुचिरलंकृतः ॥ १ ॥
वाचयित्वा स्वस्त्ययनं
जातकर्मात्मजस्य वै ।
कारयामास विधिवत् पितृदेवार्चनं तथा ॥
२ ॥
धेनूनां नियुते प्रादाद् विप्रेभ्यः
समलंकृते ।
तिलाद्रीन् सप्त रत्नौघ
शातकौंभांबरावृतान् ॥ ३ ॥
कालेन स्नानशौचाभ्यां संस्कारैः
तपसेज्यया ।
शुध्यन्ति दानैः सन्तुष्ट्या
द्रव्याण्यात्माऽऽत्मविद्यया ॥ ४ ॥
सौमंगल्यगिरो विप्राः सूतमागधवन्दिनः
।
गायकाश्च जगुर्नेदुः भेर्यो दुन्दुभयो
मुहुः ॥ ५ ॥
व्रजः सम्मृष्टसंसिक्त
द्वाराजिरगृहान्तरः ।
चित्रध्वज पताकास्रक् चैलपल्लवतोरणैः
॥ ६ ॥
गावो वृषा वत्सतरा हरिद्रातैलरूषिताः
।
विचित्र धातुबर्हस्रग्
वस्त्रकाञ्चनमालिनः ॥ ७ ॥
महार्हवस्त्राभरण कञ्चुकोष्णीषभूषिताः
।
गोपाः समाययू राजन् नानोपायनपाणयः ॥ ८
॥
गोप्यश्चाकर्ण्य मुदिता यशोदायाः
सुतोद्भवम् ।
आत्मानं भूषयां चक्रुः
वस्त्राकल्पाञ्जनादिभिः ॥ ९ ॥
नवकुंकुमकिञ्जल्क मुखपंकजभूतयः ।
बलिभिस्त्वरितं जग्मुः
पृथुश्रोण्यश्चलत्कुचाः ॥ १० ॥
गोप्यः सुमृष्टमणिकुण्डल निष्ककण्ठ्यः ।
चित्राम्बराः पथि
शिखाच्युतमाल्यवर्षाः ।
नन्दालयं सवलया व्रजतीर्विरेजुः
व्यालोलकुण्डल पयोधरहारशोभाः ॥ ११
॥
ता आशिषः प्रयुञ्जानाः चिरं पाहीति बालके ।
हरिद्राचूर्णतैलाद्भिः सिञ्चन्त्यो
जनमुज्जगुः ॥ १२ ॥
अवाद्यन्त विचित्राणि वादित्राणि
महोत्सवे ।
कृष्णे विश्वेश्वरेऽनन्ते नंदस्य
व्रजमागते ॥ १३ ॥
गोपाः परस्परं हृष्टा
दधिक्षीरघृतांबुभिः ।
आसिञ्चन्तो विलिंपन्तो नवनीतैश्च
चिक्षिपुः ॥ १४ ॥
नन्दो महामनास्तेभ्यो
वासोऽलंकारगोधनम् ।
सूतमागधवन्दिभ्यो येऽन्ये
विद्योपजीविनः ॥ १५ ॥
तैस्तैः कामैरदीनात्मा यथोचितं
अपूजयत् ।
विष्णोराराधनार्थाय स्वपुत्रस्योदयाय
च ॥ १६ ॥
रोहिणी च महाभागा नंदगोपाभिनंदिता ।
व्यचरद् दिव्यवासःस्रक्
कण्ठाभरणभूषिता ॥ १७ ॥
तत आरभ्य नंदस्य व्रजः
सर्वसमृद्धिमान् ।
हरेर्निवासात्मगुणै रमाक्रीडमभून् नृप
॥ १८ ॥
गोपान् गोकुलरक्षायां निरूप्य मथुरां
गतः ।
नंदः कंसस्य वार्षिक्यं करं दातुं
कुरूद्वह ॥ १९ ॥
वसुदेव उपश्रुत्य भ्रातरं नंदमागतम् ।
ज्ञात्वा दत्तकरं राज्ञे ययौ तद्
अवमोचनम् ॥ २० ॥
तं दृष्ट्वा सहसोत्थाय देहः
प्राणमिवागतम् ।
प्रीतः प्रियतमं दोर्भ्यां सस्वजे
प्रेमविह्वलः ॥ २१ ॥
पूजितः सुखमासीनः पृष्ट्वा
अनामयमादृतः ।
प्रसक्तधीः स्वात्मजयोः इदमाह
विशांपते ॥ २२ ॥
दिष्ट्या भ्रातः प्रवयस इदानीमप्रजस्य
ते ।
प्रजाशाया निवृत्तस्य प्रजा यत्
समपद्यत ॥ २३ ॥
दिष्ट्या संसारचक्रेऽस्मिन् वर्तमानः
पुनर्भवः ।
उपलब्धो भवानद्य दुर्लभं प्रियदर्शनम्
॥ २४ ॥
नैकत्र प्रियसंवासः सुहृदां
चित्रकर्मणाम् ।
ओघेन व्यूह्यमानानां प्लवानां स्रोतसो
यथा ॥ २५ ॥
कच्चित् पशव्यं निरुजं
भूर्यम्बुतृणवीरुधम् ।
बृहद्वनं तदधुना यत्रास्से त्वं
सुहृद्वृतः ॥ २६ ॥
भ्रातर्मम सुतः कच्चित् मात्रा सह
भवद्व्रजे ।
तातं भवन्तं मन्वानो भवद्भ्यामुपलालितः
॥ २७ ॥
पुंसस्त्रिवर्गो विहितः सुहृदो
ह्यनुभावितः ।
न तेषु क्लिश्यमानेषु त्रिवर्गोऽर्थाय
कल्पते ॥ २८ ॥
श्रीनंद उवाच
अहो ते देवकी पुत्राः कंसेन बहवो हताः
।
एकावशिष्टावरजा कन्या सापि दिवं गता ॥
२९ ॥
नूनं ह्यदृष्टनिष्ठोऽयं अदृष्टपरमो
जनः ।
अदृष्टमात्मनस्तत्त्वं यो वेद न स
मुह्यति ॥ ३० ॥
श्रीवसुदेव उवाच
करो वै वार्षिको दत्तो राज्ञे दृष्टा
वयं च वः ।
नेह स्थेयं बहुतिथं सन्त्युत्पाताश्च
गोकुले ॥ ३१ ॥
श्रीशुक उवाच
इति नंदादयो गोपाः प्रोक्तास्ते
शौरिणा ययुः ।
अनोभिः अनडुद्युक्तैः तं अनुज्ञाप्य
गोकुलम् ॥ ३२ ॥
इति श्रीमद्भागवते महापुराणे पारमहंस्यां
संहितायां दशमस्कन्धे पूर्वार्धे पञ्चमोऽध्यायः ॥ ५ ॥
