 |
| bhagwat chapter 9.17 |
श्रीशुक
उवाच
यः पुरूरवसः पुत्र आयुः तस्याभवन्
सुताः ।
नहुषः क्षत्रवृद्धश्च रजी रंभश्च
वीर्यवान् ॥ १ ॥
अनेना इति राजेन्द्र शृणु
क्षत्रवृधोऽन्वयम् ।
क्षत्रवृद्धसुतस्यासन्
सुहोत्रस्यात्मजास्त्रयः ॥ २ ॥
काश्यः कुशो गृत्समद इति
गृत्समदादभूत् ।
शुनकः शौनको यस्य बह्वृचप्रवरो मुनिः
॥ ३ ॥
काश्यस्य काशिः तत्पुत्रो राष्ट्रो
दीर्घतमःपिता ।
धन्वन्तरिर्दैर्घतम आयुर्वेदप्रवर्तकः
॥ ४ ॥
यज्ञभुग् वासुदेवांशः
स्मृतमात्रार्तिनाशनः ।
तत्पुत्रः केतुमानस्य जज्ञे
भीमरथस्ततः ॥ ५ ॥
दिवोदासो द्युमांस्तस्मात् प्रतर्दन
इति स्मृतः ।
स एव शत्रुजिद् वत्स ऋतध्वज इतीरितः ।
तथा कुवलयाश्वेति
प्रोक्तोऽलर्कादयस्ततः ॥ ६ ॥
षष्टि वर्षसहस्राणि षष्टि वर्षशतानि च
।
नालर्काद् अपरो राजन् मेदिनीं बुभुजे
युवा ॥ ७ ॥
अलर्कात् सन्ततिस्तस्मात् सुनीथोऽथ
निकेतनः ।
धर्मकेतुः सुतस्तस्मात् सत्यकेतुरजायत
॥ ८ ॥
धृष्टकेतुः सुतस्तस्मात् सुकुमारः
क्षितीश्वरः ।
वीतिहोत्रोऽस्य भर्गोऽतो
भार्गभूमिरभून्नृप ॥ ९ ॥
इतीमे काशयो भूपाः
क्षत्रवृद्धान्वयायिनः ।
रम्भस्य रभसः पुत्रो
गम्भीरश्चाक्रियस्ततः ॥ १० ॥
तस्य क्षेत्रे ब्रह्म जज्ञे श्रृणु
वंशमनेनसः ।
शुद्धस्ततः शुचिस्तस्मात् त्रिककुद्
धर्मसारथिः ॥ ११ ॥
ततः शान्तरजो जज्ञे कृतकृत्यः स
आत्मवान् ।
रजेः पञ्चशतान्यासन् पुत्राणां
अमितौजसाम् ॥ १२ ॥
देवैरभ्यर्थितो दैत्यान्
हत्वेन्द्रायाददाद् दिवम् ।
इन्द्रस्तस्मै पुनर्दत्त्वा गृहीत्वा
चरणौ रजेः ॥ १३ ॥
आत्मानमर्पयामास प्रह्रादाद्यरिशंकितः
।
पितरि उपरते पुत्रा याचमानाय नो ददुः
॥ १४ ॥
त्रिविष्टपं महेन्द्राय यज्ञभागान्
समाददुः ।
गुरुणा हूयमानेऽग्नौ बलभित् तनयान्
रजेः ॥ १५ ॥
अवधीद् भ्रंशितान् मार्गान् न कश्चित्
अवशेषितः ।
कुशात् प्रतिः क्षात्रवृद्धात्
संजयस्तत्सुतो जयः ॥ १६ ॥
ततः कृतः कृतस्यापि जज्ञे हर्यवनो
नृपः ।
सहदेवस्ततो हीनो जयसेनस्तु तत्सुतः ॥
१७ ॥
सङ्कृतिस्तस्य च जयः क्षत्रधर्मा
महारथः ।
क्षत्रवृद्धान्वया भूपा इमे श्रृणु
वंशं च नाहुषात् ॥ १८ ॥
इति श्रीमद्भागवते महापुराणे पारमहंस्यां
संहितायां नवमस्कन्धे सप्तदशोऽध्यायः ॥ १७ ॥
