मुद्गलपुराणोक्त श्रीगणेशाऽष्टोत्तरशतनामस्तोत्रम् | भयमुक्त करने वाले श्रीगणेशजी के 108 नाम
॥अथश्रीगणेशाऽष्टोत्तरशतनामस्तोत्रम्॥
यम उवाच
गणेश हेरम्ब गजाननेति महोदर स्वानुभवप्रकाशिन् ! ।
वरिष्ठ ! सिद्धिप्रिय ! बुद्धिनाथ ! वदन्तमेवं त्यजत प्रभीताः ॥ १ ॥
अनेकविघ्नान्तक वक्रतुण्ड स्वसंज्ञवासिंश्च चतुर्भुजेति ।
कवीश देवान्तकनाशकारिन् ! वदन्तमेवं त्यजत प्रभीताः ॥२॥
महेशसूनो गजदैत्यशत्रो वरेण्यसूनो विकट त्रिनेत्र ! |
परेश पृथ्वीधर एकदन्त वदन्तमेवं त्यजत प्रभीताः ॥ ३ ॥
प्रमोद मोदेति नरान्तकारे षडूर्मिहन्तर्गजकर्ण ढुण्ढे ! ।
द्वन्द्वारिसिन्धो स्थिरभावकारिन् ! वदन्तमेवं त्यजत प्रभीताः ॥ ४ ॥
विनायक ज्ञानविघातशत्रो पराशरस्यात्मज विष्णुपुत्र ! ।
अनादिपूजाऽऽखुग सर्वपूज्य! वदन्तमेवं त्यजत प्रभीताः ॥ ५ ॥
विद्येज्य लम्बोदर धूम्रवर्णं मयूरपालेति मयूरवाहिन् ! ।
सुराऽसुरैः सेवितपादपद्म वदन्तमेवं त्यजत प्रभीताः ॥६॥
वरिन्महाखुध्वज शूर्पकर्ण शिवाज सिंहस्थ अनन्तवाह ! |
दितौज विघ्नेश्वर शेषनाभे वदन्तमेवं त्यजत प्रभीताः ॥७॥
अणोरणीयो महतो महीयो रवेर्ज योगेशज ज्येष्ठराज ! |
निधीश मन्त्रेण च शेषपुत्र वदन्तमेवं त्यजत प्रभीताः ॥८॥
वर प्रदातरदितेश्च सूनो परात्पर ज्ञानद तारवक्त्र ! |
गुहाग्रज ब्रह्मण पार्श्वपुत्र वदन्तमेवं त्यजत प्रभीताः ॥ ९ ॥
सिन्धोश्च शत्रो परशुप्रयाणे शमीश पुष्पप्रिय विघ्नहारिन् ।
दूर्वाभरैरर्चित देवदेव वदन्तमेवं त्यजत प्रभीताः ॥१०॥
धियः प्रदातुश्च शमीप्रियेति सुसिद्धिदातश्च सुशान्तिदातः ।
अमेय मायामित विक्रमेति वदन्तमेवं त्यजत प्रभीताः ॥ ११ ॥
द्विधा चतुर्थीप्रिय कश्यपाच्च धनप्रद ज्ञानपदप्रकाशिन् ।
चिन्तामणे चित्तविहार कारिन् । वदन्तमेवं त्यजत प्रभीताः ॥ १२ ॥
यमस्य शत्रो ह्यभिमानशत्रो विधेर्जहन्तः कपिलस्य सूनो ।
विदेह स्वानन्दज योगयोग वदन्तमेवं त्यजत प्रभीताः ॥ १३॥
गणस्य शत्रो कपिलस्य शत्रो समस्तभावज्ञ च भालचन्द्र ।।
अनादि-मध्यान्तमय प्रचारिन् वदन्तमेवं त्यजत प्रभीताः ॥१४॥
विभो जगद्रुप गणेश भूमन् पुष्टेः पते आखुगतेति बोधः ।
कर्तुश्च पातुश्च तु संहरेति वदन्तमेवं त्यजत प्रभीताः ॥१५॥
इदमष्टोत्तरशतं नाम्नां तस्य पठन्ति ये ।
शृण्वन्ति तेषु वै भीताः कुरुध्वं मा प्रवेशनम् ।। १६ ।।
भुक्ति मुक्तिप्रदं ढुण्ढेर्धन-धान्य प्रवर्धनम् ।
ब्रह्म भूतकरं स्तोत्रं जपन्तं नित्यमादरात् ॥ १७ ॥
यत्र कुत्र गणेशस्य चिह्नयुक्तानि वै भटाः ।
धामानि तत्र संभीताः कुरुध्वं मा प्रवेशनम् ।। १८ ।।
इति श्रीमुद्गलपुराणे यमदूतसंवादे गणेशाऽष्टोत्तरशतनामस्तोत्रम् ॥९॥
